Dinamizazioa eta formakuntza

Formakuntza

Herri Mugimenduok gure lan gaitasuna indartu eta biderkatzeko, gogoeta eta elkarlanaz gain, gure burua bitarteko ezberdinez hornitzeko beharra dugu. Eta hortxe kokatzen dugu formazioaren premia zahar-berria. Formazio ideologikoa, historikoa (transmisioa), metodologikoa, teknologikoa, emozionala… asko dira, gure ustez, formazio bidez landu beharreko eremuak, formazio politikoa punta askotako izarra dugula uste baitugu.

Sarri azpimarratu izan ohi dugun bezala, metodologia ere politikoa da. Formak, moduak, politikoak dira. Zer egiten dugun garrantzitsua bada, nola egiten dugun ere kontuan hartu beharko dugu. Formazio prozesuetan dinamika askatzaile eta parte hartzaileek jabekuntza prozesuan laguntzen dute eta horizontaltasunak autonomian eta botere harremanen berdefinitzean eragina izaten du.

Jakintzaren eraikuntza kolektiboa ardatz, herri mugimenduetan sortzen diren jakintza eta ezagutzen ikusgarritasun eta errekonozimenduaren aldeko apustua egiten dugu.

Formazio politikoa ikuspegi honetatik lantzen dituzten egitasmoak sustatzea dugu xede eta horretan dihardugu.

Dinamizazioa

Kolektibo eta mugimenduetatik prozesuen diseinu eta “dinamizazio” lanetarako iristen zaizkigun laguntza eskaerei erantzutea Joxemi Zumalabe Fundazioaren nahietako bat da.

Deialdiak, bileren dinamizazioa, aktak, zirriborroak eta gogoetatutakoaren itzulera

Izan ere, kolektiboen barne gogoetetan eta beraien arteko elkarlan zein artikulazio prozesuetan laguntzea gure jardunaren ardatz nagusietako bat bilakatu nahi dugu. Deialdiak, bileren dinamizazioa, aktak, zirriborroak eta gogoetatutakoaren itzulera dokumentuak prestatzea dira egiten ohi ditugun lanak.

Kide eta herritar ororen parte hartzea bermatzeko bitartekoak sortu

Pedagogia emantzipatzaileetan oinarritzen diren printzipio politikoekin bat datozen irizpideetan oinarrituz egitea dugu helburu. Besteak beste, dinamizazio prozesuetan alde arrazionalaz gain, alde erlazional eta emozionala ere mahaigaineratuz, gorpuztasuna eta ludikotasuna prozesuetan iraunkorki integratuz eta kide eta herritar ororen parte hartzea bermatzeko bitartekoak sortuz.

Botere harremanak eta erabakitze moduak

Jakintzaren eraikuntza kolektiboari, talde lanari, prozesuetan bertan gauzatzen diren botere harremanei zein erabakitze moduei arreta berezia eskaintzen diegu. Azken batean herri eragile ezberdinen barne funtzionamendua indartzea eta partaide diren kideak dinamizazio lanetan ahalduntzea eta trebatzea ildo honen erronka nagusitzat jotzen ditugu.

Esperimentazio espazioa:

Dinamizazio-ildoaren baitan Esperimentazio espazioa deritzogun egitasmoa indarrean dugu ere: barne formakuntzarako espazioa da, dinamika ezberdinak esperimentatzeko, asmatzeko edota ensaiatzeko espazioa, alegia. Espazio honek dinamizazioan trebatzeko eta egoera ezberdinei dinamizazioaren ikuspegitik zelan heldu ahal diegun probatzeko helburua dauka, guzti hau talde txiki, eroso eta seguru batean eginez.

Lan ildo honetan jorratutako azken prozesu eta ekimenak hauek izan dira: